Telefon

Berin tlf.

222993

 

Stuðla Beranum

Privatur stuðul hevur alstóran týdning fyri, at Berin kann at hjálpa flest møguligum børnum, ungum og familjum teirra.

 

Stuðla Beranum  á konto 6460 1655363

 

Ella tekna teg sum lim og stuðla við 200 kr. árliga. Tekna teg sum lim við at skriva til info@berin.fo 

 

 
 
Send okkum nøkur orð við einum teldubrævi á
 
  
  Hevur tú mist mammu, pápa ella systkin, og hevur tú hug at siga øðrum frá tínum upplivingum, so vilja vit fegin leggja tína søgu á heimasíðuna. 
 
    Neyðugt er at upplýsa navn og bústað. Men um tú ynskir at vera dulnevnd/-ur, er hetta sjálvsagt møguligt.  
 
 Sí annars hvat onnur hava skrivað undir "Mín søga".
 
 
Stuðul
 
Allur stuðul til Beran er kærkomin.
Ynskir tú at vera við til at stuðla arbeiðnum hjá Beranum fíggjarliga,
er tú vælkomin at seta teg í samband við okkum ella at flyta pening á konto:
6460 1655363 
 
 Nýggir bólkar og tilmelding
 
Nýggir bólkar byrja mikudagin 18.september. Vit hittast annan hvønn mikudag kl. 16-18. Melda til við at ringja til okkara, 
skriva eini boð í innbakkan á facebook ella við at senda okkum ein teldupost á info@berin.fo


Um tú hevur hug at vita meira um okkum og hvat vit gera í Beranum,
ert tú sjálvsagt eisini vælkomin at seta teg í samband við okkum.
 
 
 
 
 
 
 
 
 
 

Navnið

Berin merkir á donskum lysning, ofta brúkt sum en lysning i skoven, eitt stað, har sólin altíð sleppur framat. Á føroyskum kunnu vit eisini brúka hugtakið berajól, sita á berajólum, uttan verju, nakað sum tey ið mist hava, kenna alt ov væl.

Harumframt kann navnið Berin, fáa ein at hugsa um at bera. Lyfta vit í felag, kennist byrðan lættari.

 

Búmerkið

Búmerkið, sum Jóngerð Poulsen hevur skorið í linoleum, er ímyndin av lívinum við sínum ljósu og myrku síðum. Tað skal minna okkum á, at sjálvt tá tað sær svartast út, ber til at leita eftir glottum. Og tá ið alt sær ljóst út, er tað tann svarta rípan, sum ger mynstrið.

Bólkafundir

Tá nýggjur bólkur byrjar, bjóða vit eina samrøðu. Um talan er um børn/ung yngri enn 18 ár luttaka foreldur/avvarðandi til samrøðuna.

 

Bólkafundir eru aðru hvørja viku í tveir tímar. Børn/ung vanliga ml. kl. 16 - 18 og ung/vaksin ml. kl. 19-21. 

 

Til fundirnar luttaka tveir bólkaleiðarar, ið stuðla og leggja lag á. Bólkarnir verða samansettir út frá aldri, kyn og umstøðunum hjá luttakarunum.

 

Eitt nýtt bólkaskeið byrjar hvørt hálvár. Eitt skeið svarar til uml. 10 ferðir.

 

Tá ein luttakari er liðugur at ganga í bólki, enda vit við einari eftirmetingarsamtalu, har tikið verður samanum.

 

Fyri at øll kunna hava møguleika fyri at vera við í sorgarbólki, leggja vit dent á, at kostnaður ikki skal verða ein forðing fyri at luttaka. Fyri børn og ung er kostnaðurin 300 kr. fyri 10 ferðir (t.v.s. 30 kr. fyri hvørja ferð). Fyri hvørt systkin, ið kemur afturat, er kostnaðurin 50 kr. tilsamans fyri 10 ferðir (t.v.s. 5 kr. fyri hvørja ferð). 

Aldursbólkar

Tá ið Berin bleiv stovnaður, var sorgarbólkurin fyrst og fremst tilætlaður børnum/ungum í skúla aldri t.v.s frá uml. 7 til 16 ár.

 

Við tíðini hevur aldurmarkið fyri at verða við í bólki flutt seg. T.d hava fleiri bólkar verið við ungum í aldrinum 16 ár til fyrst í 20´unum.

 

Nakrir bólkar hava eisini verið fyri vaksin, sum hava mist sum børn/ung.

 

Harumframt hava eisini verið bólkar fyri foreldur, ið hava mist børn/pinkubørn.

 

Higartil hava uml. 600 børn/ung og vaksin, úr øllum Føroyum, luttikið í Beranum.

Starvsfólk og bólkaleiðarar 

 Starvsfólkini í Beranum eru ein samanseting av leiðslu og bólkaleiðarum, sum arbeiða í einum tvørfakligum toymi.
 

- Oddvør Poulsen, dagligur leiðari og bólkaleiðari í Beranum. Útbúgvin bach. í námsfrøði og undir eftirútbúgving í Diplom í leiðslu

- Alisa Hammer, bólkaleiðari. Námsfrøðingur og familjuterapeutur innan narrativa terapi

- Lív Højsted Horsdal, bólkaleiðari. Sálarfrøðingur og undir eftirútbúgving í spæliobservstión og -viðgerð

- Elin Ziska, bólkaleiðari. Heilsufrøðingur

- Avloysari: Jóngerð Poulsen, heilsufrøðingur við familjuterapeut/-ráðgevara útbúgving frá The Kempler Institut of Scandinavia

 

Endamálsorðing

Endamál Berans er

·         at skipa fyri sorgarbólkum, fyri børn/ung og avvarðandi, ið hava mist ein av sínum nærmastu

·         At ráðgeva, vegleiða og stuðla avvarðandi, vinum, fakfólki v.m.

·         Alment kunnandi og fyribyrgjandi virksemi t.d. fyrilestrar á skúlum og stovnum

Kjarnu uppgávan er at  at virka fyri, at børn/ung og avvarðandi, sum frálíður, gerast betur før fyri at handfara sorgina. Á tann hátt hava tey størri møguleika fyri aftur at fáa eitt gott og innihaldsríkt lív, har tey kunnu mennast og liva við missinum.

 

 

 

 

 

 

 

Søgan hjá Beranum

 

Søgan hjá Beranum byrjar í 2002. Tað vóru Anna Dalsgaard og Jóngerð Poulsen, sum stovnaðu sorgarbólkarnar fyrst í 2003. Í dagliga arbeiðinum sóu tær tørvin á tiltøkum fyri børn, ið høvdu mist foreldur við deyða. Tær mettu, at útbúgvingar teirra, góvu teimum førleika til at stovna sorgarbólkarnar. Anna er útbúgvin lærari og hevur síðani tikið pædagogiska diplomútbúgving í Danmarks Lærerhøjskole í Keypmannahavn. Jóngerð er heilsufrøðingur og hevur síðani tikið prógv sum familjuterapeutur á Kempler instituttinum.

 

Tær leitaðu sær tilfar, og tosaðu við fólk. Tað sum brúkt var, var í høvuðsheitum hetta:

- Kræftens Bekæmpelse – tilfar um sorg, og samrøða við Jes Dige. Jes Dige er psykologur og var við til at stovna sjálvhjálparbólkar fyri børn og ung í Danmark

- Børns Vilkår – tilfar og samrøða við ráðgeva

- Atle Dyregrov – Sorg hos børn

- Atle Dyregrov og Magne Raundalen – Sorg og omsorg i skolen

- Atle Dyregrov – Børn og traumer

- Donna O´Toole – Marve Myrtbjørn fatter håb v/ læraravegleiðing

- Anni Schwarts Hansen – Jeg savner dig, om sorgarbejdet blandt unge, der har mistet en far eller mor 

 

Valt var at síggja hesa uppgávu, sum eitt arbeiði, ið skuldi lønast. Tær høvdu ikki farið í gongd við hetta, um tær arbeiddu fulla tíð. Umsókn um fíggjarligan stuðul varð send til Fyribyrgingarráðið, flestu kommunur í landinum, til fakfeløg og fyritøkur. Tað bleiv tikið væl undir við tiltakinum, hóast flest øll søgdu, at tey stuðlaðu fyri at fáa sorgarbólkarnar í gongd, men at tey annars mettu hetta sum eina landsuppgávu. Umsókn varð eisini send til Almanna- og Heilsumálaráðið, men fyrstu árini fekst eingin stuðul haðani.

 

Tørvurin, at taka hond um børnini og tey ungu, vísti seg rættiliga skjótt at vera stórur. Longu sama ár, sum fyrstu bólkarnir fóru í gongd, var tørvur á einum bólkaleiðara afturat og í  aug. 2003 byrjaði Oddvør Poulsen, námsfrøðingur, sum bólkaleiðari. Síðani 2006 hava 4 bólkaleiðarar støðugt verið knýttir at barna- og ungdómsbólkunum og einstøkum bólkum fyri vaksin. Alisa Hammer, námfrøðingur, hevur verið bólkaleiðari síðan 2010. Harumframt hevur Katrina L. Joensen, sálarfrøðingur, havt bólkar frá 2006-2007 fyri foreldur, ið hava mist barn/børn.

 

Í 2007 fingu bólkarnir játtaðar 100.000 kr. í stuðli frá Almanna- og heilsumálaráðnum. Sama ár arbeiddu táverandi bólkaleiðarar við hugskotum til at navngeva og fáa eitt búðmerki til bólkarnar. Navnið varð ásett at vera Berin (sí nærri lýsing um navnið omanfyri). Jóngerð Poulsen hevur skapað og skorið vakra, symbolska búðmerkið úr linoleum (sí nærri lýsing um búmerkið omanfyri).   

 

Arbeitt hevur verið miðvíst øll árini at lýsa tørvin og fyribyrgjandi týdningin av hesum arbeiði. Ein onnur broyting sum er farin fram hesi árini, er ein hugburðsbroyting í samfelagnum, sum heild, har sorg er vorðin minni tabu.

 

Í 2013, tá Berin rundaði 10 ár, var virksemið vorðið so mikið umfatandi, at tað gjørdist alsamt meira trupult, hjá bólkaleiðarunum, at samskipa tær støðugt vaksandi uppgávurnar. Umframt bólkavirksemi vóru alsamt fleiri áheitanir um ráðgeving og vegleiðing frá avvarðandi og fakfólki. Berin var komin á eitt vegamót!

 

Á fundi við AMR og avvarðandi landsstýriskvinnu, Anniku Olsen, í 2013, varð víst á, at Berin hevði tørv á hægri játtan fyri at kunna halda áfram við arbeiðinum. Fyri at felagsskapinum skuldi vera lív laga, var tørvur á egnum hølum og einum dagligum leiðara, at taka sær av m.a. fyrisitingarliga arbeiðinum, samskipan og tilrættarleggjan av øllum virkseminum og at skipa ráðgevingar- og fyribyrgingararbeiðið.

 

Í 2014 var stuðulsjáttanin frá AMR hækkað til 300.000 kr. Síðan tá, hevur felagsskapurin skipað seg við aðalfundi, viðtøkum, nevnd, leiðslu og bólkaleiðarum. Dagligur leiðari er Oddvør Poulsen, sum er sett í eitt partíðarstarv. Í nevndini sita, Ingvør Skaalum, formaður, Alisa Hammer og Mirjam Johannesen, nevndarlimir og Hildigunn Sørensen, eyka limur.

Eftir at hava flutt ymsa staðni í býnum ígjøgnum árini, flutti Berin í januar 2104 inn í hugnalig hølir í Niels Finsens Gøtu 32, saman við Amnesty International og Barnabata. Í juni 2014 valdi Anna Dalsgaard at leggja frá sær og í august 2015 fór Jóngerð Poulsen frá vegna aldur. Báðar hava lagt frá sær, við tí vón, at arbeiðið framyvir er kjølfest. Vit takka hjartaliga Annu Dalsgaard og Jóngerð Poulsen fyri stovnanina av Beranum og teirra eldhuga og virðismikla arbeiði fyri at betra um korini hjá børnum,  ungum og avvarðandi, ið hava mist ein av sínum nærmastu. Í nov. 2014 byrjaði Lív Højsted Horsdal, sálarfrøðingur, sum nýggjur bólkaleiðari fyri Annu Dalsgaard og í aug. 2015 byrjaði Elin Ziska, heilsufrøðingur, sum nýggjur bólkaleiðari fyri Jóngerð Poulsen.

 

Berin er ein landssumfatandi felagsskapur, samansettur av einum tvørfakligum toymi, við viðkomandi útbúgvinum og førleikum. Í løtuni eru uml. 40 børn og ung í aldrinum 7 ár til fyrst í 20´unum knýtt at aldursbýttum bólkum í Beranum. Berin veitur vegleiðing og ráðgeving til avvarðandi og fakfólk, umvegis teldupost, telefon og persónligar viðtalur. Harumframt arbeiður Berin við fyribyrgjandi og kunnandi virksemi t.d:

- framløgur á skúlum, stovnum v.m.

- vitjanum í skúlaflokkum hjá børnum, ið eru knýtt at Beranum. Hetta fyri at økja um forstáilsi hjá flokksfelagum/lærarunum og vegleiða í, hvussu tey kunna stuðla best møguligt

- umvegis miðlarnar, alnótina, við faldarum v.m. 

 

Síðan 2013 hevur verður skipað fyri einum árligum, afturvendandi tiltakið á Føroya Fólkaháskúla, har øll, sum hava verið knýtt at Beranum, hava møguleika fyri at hittast aftur og at luttaka saman við síni familju. Á skeiðnum er pláss fyri gaman og álvara. Dugnaligir verksstaðsleiðarar skipa fyri kreativum verkstøðum, har eisini er møguleiki fyri at arbeiða á ein øðrvísi hátt við sínum tonkum og kenslum í samband við sorgina. Skipa verður fyri framløgum har ung/vaksin, ið hava mist, greiða frá síni søgu og fakfólk, hava fyrilestrar við viðkomandi evnum. Eisini er rúm fyri skemti og undirhaldi t.d. tónleiki, dansi og spølum.

 

Í 2015 verður fyrstu ferð skipa fyri Café kvøldi, sum ung, sjálboðin stíla fyri. Endamálið við tiltakinum er, at ung fáa høvi at hittast og práta við onnur ung í líknandi støðu. Tiltakið er fyri ung í aldrinum uml. 16-28 ár, ið hava mist ein av sínum nærmastu, ella kenna onkran í hevur mist, t.d. vinir, flokksfelagar ella unnusta/unnustu. Fyrsta Café kvøldið var 7. mai á Hotell Føroyum. Maria í Garði og Rannvá Arnadóttir greiddu frá, hvussu tað er at hava mist foreldur/systkin og samstundis at megna avbjóðingar í samband við at ganga á miðnám. Næsta Café kvøldið var 3. sept. í Hvonn. Døgg Nónsgjógv og Sára Strøm Debes greiddu frá sínum upplivingum við at missa forelsur sum barn, og hvussu sorgin hevur broytt seg ígjøgnum árini. Til Café kvøldini hava verið uml. 30-45 luttakarar. Nakrir av luttakarunum høvdu luttikið í Beranum, meirilutin vóru tó ung, ið ikki hava havt samband við Beran áður. Ætlanin er, at Café kvøldini verða eitt afturvendandi tiltak, har ymisk viðkomandi evni, í samband við at verða barn/ungur og at missa ein av sínum nærmastu, verða á skránni. Tvey Café kvøld verða um várið 2016. 

 

Virksemið hjá Beranum verður fíggjað við almennum stuðli, donatiónum, ið samband við jarðaferðir og stuðli frá fyritøkum ella privatum. Almenni stuðulin á 300.000 kr. er grundarlagið fyri rakstri/leiðslu av dagliga virkseminum og einum landsumfatandi, fakliga kompetentum virksemi. Stuðul frá donatiónum, privatum og fyritøkum verður fyrst og fremst brúktur til sorgarbólkar. Allur stuðul er tí sera týdningarmikil og kærkomin í mun til arbeiðið við børnum/ungum og teirra avvarðandi, ið hava mist!

 

Ynskir tú at stuðla, er tú vælkomin at lata eina peningagávu til Beran á konto 6460 1655363. Ella tú kann skráseta teg sum lim og stuðla við eini fastari árligari upphædd á 200 kr. Tekna teg sum lim við at skriva til info@berin.fo ella við at ringja til Beran á tlf. 222993.  

 

Ver við til at stuðla arbeiðnum hjá Beranum at  hjálpa børnum, ungum og teirra avvarðandi, ið hava mist ein av sínum nærmastu. Tín hjálp ger mun! Stuðla Beranum!